ବ୍ୟୁରୋ ରିପୋର୍ଟ, ଓଡ଼ିଆ ଫାଷ୍ଟ, ଭୁବନେଶ୍ୱର, ୨ ଅକ୍ଟୋବର ୨୦୨୫
ଓଡ଼ିଶାରେ ଏବେ ୭ଟି ନ୍ୟୁଜ ଚ୍ୟାନେଲ ଉପଲବ୍ଧ ଅଛି। ଦର୍ଶକୀୟ ସ୍ଵୀକୃତି ଓ ରେଟିଂ ଦୃଷ୍ଟିରୁ ସବୁଠାରୁ ଶୀର୍ଷରେ ଓଟିଭି ଥିବା ବେଳେ ୨ୟ ସ୍ଥାନରେ କନକ ନ୍ୟୁଜ ଓ ୩ୟ ସ୍ଥାନରେ ରହିଛି ନ୍ୟୁଜ ୧୮ ଓଡ଼ିଶା। ସେହିପରି ୪ର୍ଥ ସ୍ଥାନରେ ରହିଛି କଳିଙ୍ଗ ଟିଭି, ୫ମ ସ୍ଥାନରେ ଅର୍ଗସ ନ୍ୟୁଜ, ୬ଷ୍ଠ ଓ ୭ମ ସ୍ଥାନରେ ଯଥାକ୍ରମେ ରହିଛନ୍ତି ନନ୍ଦିଘୋଷ ଟିଭି ଓ ନ୍ୟୁଜ ୭।
ସବୁଠାରୁ ଗୁରୁତ୍ୱପୂର୍ଣ୍ଣ ପ୍ରସଙ୍ଗ ହେଉଛି ଏହି ଓଡ଼ିଆ ନ୍ୟୁଜ ଚ୍ୟାନେଲ ଗୁଡ଼ିକ ଏବେ ଧୀରେ ଧୀରେ ଲୋକଙ୍କର ଆସ୍ଥା ଭରସା ହରାଇବା ପରି ପ୍ରତୀୟମାନ ହେଉଛନ୍ତି। ଏମାନଙ୍କର ଦୁର୍ବଳ ରେଟିଂ ଏହି ଦିଗଟିକୁ ସାମ୍ନାକୁ ଆଣିଛି। BARC ରେଟିଂରେ ୧ ନମ୍ବର ଥିବା ଓଟିଭି ର ପ୍ରଦର୍ଶନ ଆଗଭଳି ଆଉ ନାହିଁ। ରେଟିଂରେ ୧୦୦ ପହଞ୍ଚିବା ଓଟିଭି ଭଳି ପ୍ରତିଷ୍ଠିତ ନ୍ୟୁଜ ଚ୍ୟାନେଲ ପାଇଁ ଏବେ ସ୍ବପ୍ନ ହୋଇଯାଇଛି। ସେହି ଭଳି ୨ନମ୍ବର ଓ ୩ନମ୍ବର ସ୍ଥାନରେ ଥିବା କନକ ନ୍ୟୁଜ ଓ ନ୍ୟୁଜ ୧୮ ର ପ୍ରଦର୍ଶନ ମଧ୍ୟ ସେତେଟା ପ୍ରଭାବୀ ନୁହେଁ। ୧ନମ୍ବର ସ୍ଥାନରେ ଥିବା ଓଟିଭିର ରେଟିଂର ଏମାନେ ଅଧାରେ ବି ପହଞ୍ଚି ପାରୁନାହାନ୍ତି। ଅନ୍ୟ ନ୍ୟୁଜ ଚ୍ୟାନେଲ ମଧ୍ୟରେ ତଳଆଡ଼ୁ ପ୍ରଥମରେ ରହିଛି ନ୍ୟୁଜ ୭, ୨ୟ ସ୍ଥାନରେ ଅଛି ନନ୍ଦିଘୋଷ ଟିଭି ଓ ୩ୟ ସ୍ଥାନରେ ରହିଛି ଅର୍ଗସ ନ୍ୟୁଜ। ଏହି ୩ଟି ଚ୍ୟାନେଲ ତଳଆଡ଼ୁ ୧ମ ରୁ ୩ୟ ସ୍ଥାନରେ ରହିବା ପାଇଁ ନିଜ ନିଜ ଭିତରେ ପ୍ରତିଦ୍ୱନ୍ଦିତା କରୁଛନ୍ତି। ସେହିପରି ରେଟିଂ ରେ ଉପରଆଡୁ ଓ ତଳଆଡୁ ୪ର୍ଥ ସ୍ଥାନ ବଜାୟ ରଖିଥିବା କଳିଙ୍ଗ ଟିଭିର ପ୍ରଦର୍ଶନ ଓ ଦର୍ଶକୀୟ ସ୍ୱୀକୃତି ମଧ୍ୟ ସେତେଟା ଭଲନାହିଁ। ଦୁର୍ବଳ ଖବର ପରିବେଷଣ ଶୈଳୀ ଓ ବିଜେଡି ପ୍ରତି ସର୍ବଦା ରାଜନୈତିକ ଆନୁଗତ୍ୟ ରଖିବାକୁ ଚେଷ୍ଟା କରୁଥିବା ଏହି ନ୍ୟୁଜ ଚ୍ୟାନେଲ ଏବେ ବ୍ୟବସାୟିକ ବିଫଳତା ଓ ପ୍ରଶାସନିକ ଅସ୍ଥିରତା ମଧ୍ୟରେ ଗତି କରୁଥିବା ଖବର ଶୁଣିବାକୁ ମିଳୁଛି। ଏପରିକି ଗତ ସପ୍ତାହରେ ଏହାର ପରିଚାଳନା ନିର୍ଦ୍ଦେଶକଙ୍କୁ ମଧ୍ୟ ଚାକିରୀରୁ ହଟାଇ ଦିଆଯାଇଥିବା ଖବର ସାମ୍ନାକୁ ଆସିଛି। ଯଦିଓ ପରିଚାଳନା ନିର୍ଦ୍ଦେଶକ ଥିବା ହିମାଂଶୁ ଖଟୁଆ ନିଜେ ଇସ୍ତଫା ଦେଇଥିବା କଥା ନିଜର ସୋସିଆଲ ମିଡ଼ିଆରେ ସୂଚନା ଦେଇଛନ୍ତି ମାତ୍ର କଳିଙ୍ଗ ଟିଭିର କର୍ମଚାରୀଙ୍କ କହିବା କଥା କିଛି ଭିନ୍ନ। ସେମାନଙ୍କ କହିବା ଅନୁଯାୟୀ ଚରମ ପ୍ରଶାସନିକ ବିଫଳତା ଓ ବ୍ୟାପକ ଆର୍ଥିକ ଅନିୟମିତତା ଧରାପଡ଼ିବା ପରେ ଚ୍ୟାନେଲର ମାଲିକ ପରିଚାଳନା ନିର୍ଦ୍ଦେଶକଙ୍କୁ ତାଙ୍କ ଦାୟିତ୍ବରୁ ହଟାଇଥିବା ଶୁଣିବାକୁ ମିଳୁଛି।
ସେହିପରି ରେଟିଂରେ ତଳଆଡ଼ୁ ପ୍ରଥମ ସ୍ଥାନରେ ଥିବା ନ୍ୟୁଜ ୭ର ଅବସ୍ଥା ନ କହିବା ଭଲ। ଅନଭିଜ୍ଞ ସମ୍ପାଦକ ଓ ତାଙ୍କ ଟିମର ଖବର ପରିବେଷଣ ଶୈଳୀ ଲୋକଙ୍କ ଆଦୃତି ନପାଇବା ଯୋଗୁଁ ଏହି ନ୍ୟୁଜ ଚ୍ୟାନେଲ ଏବେ ଅସ୍ତିତ୍ବ ସଂକଟରେ ଥିବା ଭଳି ମନେହୁଏ। ତେବେ ତଳଆଡୁ ୨ୟ ସ୍ଥାନରେ ଥିବା ନନ୍ଦିଘୋଷ ଟିଭିର ଅବସ୍ଥା ମଧ୍ୟ ସେତେଟା ଭଲ ନାହିଁ। ବିଜେଡ଼ିର ମୁଖପତ୍ର ଭାବେ ପରିଗଣିତ ହେଉଥିବା ଏହି ଚ୍ୟାନେଲର ସମ୍ପାଦକୀୟ ନୀତି, ଅନଭିଜ୍ଞ ସମ୍ପାଦକ ଓ ତାଙ୍କ ଟିମର ଖବର ପରିବେଷଣର ଶୈଳୀକୁ ମଧ୍ୟ ଦର୍ଶକୀୟ ସ୍ୱୀକୃତି ମିଳୁନଥିବା କଥା BARC ରେଟିଂରୁ ସ୍ପଷ୍ଟ ବାରି ହୋଇପଡ଼େ। ଏବେ ଏହି ଚ୍ୟାନେଲର ନିର୍ଦ୍ଦେଶକ ବଦଳିବା ନେଇ ସଂକେତ ମିଳିଛି। ଯାହା ଶୁଣିବାକୁ ମିଳୁଛି, ପୂର୍ବରୁ ଦାୟିତ୍ୱରେ ଥିବା ଦୁଇ ନିର୍ଦ୍ଦେଶକଙ୍କ ବଦଳରେ ଏବେ ଆଉ ଦୁଇ ନୂଆ ନିର୍ଦ୍ଦେଶକ ଯେଉଁମାନେ ବିଜେଡିର କ୍ଷମତାଶାଳୀ କୋଟେରୀ ବା ଭୈରବ ପାଣ୍ଡିଆନଙ୍କ ବିଶ୍ବସ୍ତ ସେମାନେ ଦାୟିତ୍ୱ ନେବାକୁ ଯାଉଛନ୍ତି।
ସେହିପରି ତଳଆଡ଼ୁ ୩ୟ ସ୍ଥାନରେ ଥିବା ଅର୍ଗସ ନ୍ୟୁଜ ଏବେ ଧିରେ ଧିରେ ଅଣ୍ଟା ସଳଖି ଛିଡ଼ା ହେବାକୁ ଉଦ୍ୟମ କରୁଛି। କିଛିଦିନ ପୂର୍ବରୁ ଏହାର ସମ୍ପାଦକ ସଞ୍ଜୟ ଜେନାଙ୍କୁ ମଧ୍ୟ ଦାୟିତ୍ୱରୁ ହଟାଇ ଦିଆଯାଇଛି। ଦୁର୍ବଳ ସମ୍ପାଦକୀୟ ନୀତି ଓ ପ୍ରଭାବହୀନ ଖବର ପରିବେଷଣ ପାଇଁ ଏହି ଚ୍ୟାନେଲଟି ଆଗକୁ ବଢ଼ି ପାରୁନଥିଲା, ତେଣୁ ବିଳମ୍ବରେ ହେଲେ ମଧ୍ୟ ଚ୍ୟାନେଲ କର୍ତ୍ତୃପକ୍ଷ ମୁଖ୍ୟ ସମ୍ପାଦକଙ୍କୁ ପଦରୁ ହଟାଇବାର ନିଷ୍ପତ୍ତି ନେଇ ଏବେ ଆଗକୁ ବଢ଼ିବା ପାଇଁ ଚେଷ୍ଟା କରୁଥିବା ଭଳି ମନେହୁଏ। ସେହିଭଳି ୨ୟ ଓ ୩ୟ ସ୍ଥାନରେ ଥିବା କନକ ନ୍ୟୁଜ ଓ ନ୍ୟୁଜ ୧୮ ମଧ୍ୟରେ ବେଶ ପ୍ରତିଦ୍ୱନ୍ଦ୍ୱିତା ଥିବା ଭଳି ପରିଲିକ୍ଷିତ ହେଉଛି। କନକ ନ୍ୟୁଜ ଖବର ପରିବେଷଣ ଦୃଷ୍ଟିରୁ ନ୍ୟୁଜ ୧୮ ଠାରୁ ଅପେକ୍ଷାକୃତ ଆଗରେ ରହିଛି ମାତ୍ର ଏହାର ଅସ୍ଥିର ସମ୍ପାଦକୀୟ ନୀତି ଯୋଗୁଁ ଏହା ଆଗକୁ ବଢ଼ିପାରୁ ନଥିବା ଭଳି ମନେହୁଏ। ସେହିଭଳି ନ୍ୟୁଜ ୧୮ ର ଦୁର୍ବଳ ଖବର ପରିବେଷଣ ଶୈଳୀ ଓ ଅନଭିଜ୍ଞ ସମ୍ପାଦକଙ୍କ ପାଇଁ ଏହି ନ୍ୟୁଜ ଚ୍ୟାନେଲ ମଧ୍ୟ ପଛରେ ପଡ଼ିଯାଇଛି ବୋଲି ଏହାର କର୍ମଚାରୀ ମାନଙ୍କ ଭିତରେ ଆଲୋଚନା ହେଉଥିବା ଶୁଣିବାକୁ ମିଳୁଛି ।
ତେବେ ଯାହାବି ହେଉ ଆଜି ଦିନରେ ଓଡ଼ିଶାର ଏହି ୭ଟି ନ୍ୟୁଜ ଚ୍ୟାନେଲର ଅବସ୍ଥା ସେତେଟା ଭଲ ନଥିବା ବେଳେ BARC ରେଟିଂ ସ୍ପଷ୍ଟ କରୁଛି ଯେ ଧିରେ ଧିରେ ଏହି ଚ୍ୟାନେଲ ଗୁଡ଼ିକ ଦର୍ଶକୀୟ ସ୍ୱୀକୃତି ହାସଲ କରିବାରେ ବିଫଳ ହେଉଛନ୍ତି।